“Бир нерсеге байланыштуу болгону үчүн кетти да, жөн кетпеди”. Ташиев Акылбек Жапаров тууралуу

Мурдагы премьер-министр Акылбек Жапаровдун кызматтан кетиши боюнча суроого Улуттук коопсуздук боюнча мамлекеттик комитеттин (УКМК) төрагасы Камчыбек Ташиев бүгүн, 17-декабрда, басма сөз жыйынында жооп берди.

Камчыбек Ташиев мындай деген жооп узатты:           

 -Акылбек Үсөнбековичтин жумушу боюнча эки ооз сөз айтып коеюн. Себеби мен ал киши менен үч жылдан ашык чогуу иштедим. Ал кишинин тажрыйбасы мол, экономика боюнча өтө билимдүү жигиттерден, мамлекетибизге көптөгөн жакшы жумуштарды аткарып кетти. Ал эми ал кишинин жумуштан кетиши боюнча, президент гана чечим кабыл алат, президент кабыл алган чечимдерди биз талкуулабайбыз,-деди Ташиев.

Журналисттин бул иш салык кызматындагы коррупциялык ишке байланыштуубу деп тактаганда, Камчыбек Ташиев мындай деп жооп берди:

«Бир нерсеге байланыштуу болгону үчүн кетти да, жөн кетпеди да. Айтып жатпаймынбы, ал президенттин кабыл алган чечими, биз аны талкуулабайбыз».  

16-декабрда Министрлер кабинетинин төрагасы Акылбек Жапаров кызматтан бошотулду. Бул тууралуу жарлыкка президент Садыр Жапаров кол койду.

Акылбек Жапаров Министрлер кабинетинин төрагасы — президенттик администрациянын жетекчиси болуп 2021-жылы 13-октябрда дайындалган. 2021-жылы 12-октябрда Акылбек Жапаров Министрлер кабинетинин төрагасынын милдетин аткаруучу болуп дайындалган.

11-декабрда Жогорку Кеңештин жалпы жыйынында депутат Исхак Масалиев өкмөттүн ишмердүүлүгү жетиштүү эмес экендигин, мындан улам өкмөт башчысы Акылбек Жапаров жоопкерчиликке тартылышы керектигин билдирген.

Сүрөттө: Акылбек Жапаров. Интернет булактарынан