Украинадагы кырдаал. Парламентте Министрлер кабинетинин маалыматы жабык каралууда

Бүгүн, 3-мартта, Жогорку Кеңеште Украинадагы кырдаал, анын Кыргызстанга тийгизген таасири, буга байланыштуу Министрлер кабинетинин маалыматын угуу жабык түрдө өтүп жатат.

Депутат Равшанбек Сабиров бул маселени жабык түрдө кароону сунуштады. Депута Малиев да жабык кароону колдоорун билдирди. Жалпысынан 62 депутат чечимди колдоп, маалымат парламентте жабык каралууда.       

Орусия 24-февралда Украинага басып кирген. Бир аптадан бери орус армиясы Украинанын бардык аймактарында аткылоосун жана бомбалоосун улантууда. Украин бийлиги 2-мартка карата эки миңдей жайкын тургун каза болгонун ырастады.

Орусиянын коргоо министрлиги Украинанын аймагындагы согуштук аракеттерде 498 жоокери каза болгонун, 1597си жаракат алганын 2-мартта моюнга алды.

Нью-Йоркто өткөн БУУнун Башкы ассамблеясынын чукул жыйынында Орусиянын Украинага кол салуусун айыптаган резолюция көпчүлүк добуш менен кабыл алынды.

Орусиядан согуштук аракеттерди токтотууну жана Украинанын эл аралык деңгээлде таанылган аймагынан, анын ичинде 2014-жылы аннексияланган Крым жарым аралынан аскерлерин чыгарып кетүүнү талап кылган документти уюмдун 141 мүчөсү колдоду. 35 өлкө, анын ичинде Армения, Казакстан, Кыргызстан, Тажикстан добуш берүүдөн карманышты. Резолюцияга Орусия, Беларус, Түндүк Корея, Сирия жана Эритерия каршы болду.

Сүрөт: kenesh.kg