УКМК курулуш жана күрөөгө коюлган насыя боюнча ири алдамчылык схеманы иликтөөдө

19-январда Улуттук коопсуздук мамлекеттик комитетинин (УКМК) төрагасы Камчыбек Ташиев КР жараны С.М.ге карата козголгон кылмыш иш боюнча жабырлануучу деп таанылган жарандар менен  жолугушту. УКМКда өткөн жолугушууга кармалган жаран да катышты.

Бул тууралуу УКМК басма сөз кызматы билдирди.

Жыйындын башында УКМК төрагасы маалымат берди. Анда тергөөнүн жүрүшүндө мурда бир нече жолу соттолгон С.М. узак убакыт бою мыйзамсыз күрөө жана сүткорлук менен алектенгени аныкталгандыгы айтылды. Ал жарандарга атайылап кысым көрсөтүүчү шарттарда жана жогорку пайыздык чендер менен каражат берип, андан кийин карызды алардын мүлкүн тартып алуу үчүн колдонгон.

Тергөөдө аныкталгандай, турак жайларды, жер тилкелерди жана коммерциялык объекттерди кайра жол-жоболоштуруу, аффилирленген жактардын жана көзөмөлдөөчү нотариустардын катышуусу менен жалган жана ойдон чыгарылган бүтүмдөр аркылуу ишке ашырылган. Жабырлануучуларга кысым көрсөтүү, коркутуу жана психологиялык басым аркылуу, ошондой эле мамлекеттик жана укук коргоо органдарындагы байланыштарды пайдалануу мүмкүнчүлүгү менен коштолгон уюшкан кылмыштуу иш-аракеттердин далилдери аныкталган.

Өзгөчө «Эксперт Строй» ЖЧКсынын («Щёлковый путь» турак жай комплекси) жана «Арз Девелопмент» ЖЧКсынын ишмердүүлүгүнө багытталган.      Аталган С.М. үлүштүк курулушка эки жер тилкесин берүү менен долбоорлорду ишке ашырууга тоскоолдук кылып, камакка алуу жана келишимдерди бузуу демилгесин көтөрүп, өзгөчө ири өлчөмдө талаптарды койгондугу такталган.

Мыйзамсыз аракеттердин натыйжасында “Шёлковый путь” ТЖК, «Арз Девелопмент» ЖЧКсынын 89 үлүшчүсү, ошондой эле бир катар жеке адамдар жабырлануучу деп табылган. Жыйынтыгында жалпы материалдык зыян өзгөчө чоң деп бааланып, ага мүлктү, унааларды жана каражаттарды мыйзамсыз ээликтен ажыратуу кирген.

Мындан улам Ташиев УКМК кызматкерлерине бардык күрөөканалардын ишин, анын ичинде пайыздык чендерин жана насыянын шарттарын текшерүүнү тапшырды.

Аталган кылмыш ишин тергөө анын жеке көзөмөлүнө алынганын билдирди.

Буга чейин УКМК тарабынан ири сүткор жана күрөөкана тармагынын ээси С.М.А. кармалганы маалымдалган. УКМК басма сөз кызматынын билдирүүсү боюнча, С.М.А. жеке кызыкчылыктарын көздөп, каржылык кыйынчылыктарга туш болгон жарандардын эсебинен мыйзамсыз киреше табуу үчүн Бишкек шаарынын аймагында мыйзамсыз негизде күрөөкана иштетүү жана сүткордук иштерин жүргүзгөн.

Сүрөт: УКМК