Эл аралык уюмдар «Азаттык» боюнча Садыр Жапаров менен жолугушууну сурашууда

Медиа эркиндиги жана адам укуктары боюнча жети эл аралык уюм 31-январда «Азаттыкка» жана Кыргызстандагы журналисттердин абалына байланыштуу өлкө президенти Садыр Жапаровго кайрылуу жолдоду.

CPJ уюмунун сайтына жарыяланган кайрылууда Кыргызстанда журналисттерге каршы репрессия жана эркин прессага кысым күчөгөнү, демократиялык нормалар бузулуп жатканы белгиленип, абалды талкуулоо үчүн жолугушуу өткөрүү сунушталды.

Кайрылууга кол койгондор “Азаттыкты” Кыргызстандагы эң популярдуу жана кадыр-барктуу маалымат агенттиги деп сыпаттап, ага каршы “негизсиз жана ашкере кадамдардын сериясы” ал өзүнүн көз каранды эмес репортаждары үчүн куугунтукка алынууда деген ойду жаратып жатканын белгилешти.

Иликтөөчү журналист Болот Темировдун өлкөдөн чыгарылышын анын коррупция тууралуу репортаждары үчүн өч алуу деп мүнөздөп, бул окуя кыргызстандык жана эл аралык ЖМКларды нес кылганын айтышты.

Next TV телекомпаниясы жана Kaktus.media басылмасы да журналисттик ишин аткарып жатканы үчүн гана куугунтукка кабылганын айтып, жалпыга маалымдоо каражаттары жөнүндөгү мыйзамдын жаңы варианты да сөз эркиндигине коркунуч жаратарын кошумчалашты.

“Сиз президенттик кызматка киришкенде Кыргызстан сөз эркиндиги кеңири жайылган өлкө болорун тастыктагансыз. Мурдагы саясий туткун катары сөз эркиндигин кысымга алуу канчалык зыян экенин жакшы түшүнөрүңүздү айткансыз. Жогоруда айтылган маселелерди талкуулоо жана Кыргызстанды сиз убада кылган артыкчылыктуу багыттарга өлкөнүн эл аралык милдеттенмелерине ылайык жакындатуу жолдорун аныктоо үчүн сиз менен жолугушуу мүмкүнчүлүгү берилсе жакшы болмок” деп айтылды кайрылууда.

Былтыр 26-октябрда Кыргызстандын Маданият, маалымат, спорт жана жаштар саясаты министрлиги “Азаттык Медиа” мекемесинин веб-сайтын эки айга бөгөттөө чечимин чыгарган. Январь айында аны белгисиз мөөнөткө узарткан. Министрлик өз арызын Кыргызстанда былтыртан бери иштеп баштаган “Анык эмес (жалган) маалыматтан коргоо жөнүндө” мыйзамга негиздеген.

“Азаттык Медиа” бул материалдарда журналисттик стандарттар сакталганын жана мыйзамга каршы аракет жок экендигин белгилеп келет. Буга чейин радионун юристтери аталган чечимди жокко чыгаруу өтүнүчү менен алгач Маданият, маалымат, спорт жана жаштар саясаты министрлигине, андан кийин Бишкектин административдик сотуна кайрылган. Бул маселе боюнча алгачкы соттук жараян 26-январга белгиленген.

22-январда президент Садыр Жапаровдун басма сөз катчысы Эрбол Султанбаев өлкөдө сөз эркиндигине кысым жок экендигин жана “Азаттык Медиа” боюнча чечим мыйзамдын талабына ылайык кабыл алынганын Фейсбукка жазган.

23-январда Маданият, маалымат, спорт жана жаштар саясаты министрлиги “Азаттыктын” ишмердигин токтотуу өтүнүчү менен Бишкектин Ленин райондук сотуна арызданганы маалым болду. Сот арызды кароо мөөнөтүн 9-февралга белгиледи.

Министрликтин мындай кадамын бир катар коомдук ишмерлер, медиа серепчилер, уюмдар сындап чыгышты.