БШК бардык шайлоо участокторунда кезектеги тесттик добуш берүү өткөрөт

Борбордук шайлоо комиссиясы (БШК) бүгүн, 30-октябрда, республикадагы бардык шайлоо участокторунда кезектеги тесттик аралыктан добуш берүүнү өткөрөт.

Бул тууралуу БШК билдирди.

Маалыматта айтылгандай, аралыктан добуш берүүнүн колдонулушу — келе жаткан парламенттик шайлоодогу негизги жаңылыктардын бири. Ал онлайн-идентификацияга негизделет: шайлоочу туруктуу катталган жеринде добуш берүүгө мүмкүнчүлүгү болбосо, өз участогунан тышкары же чет өлкөдө добуш бере алат.

БШК каалоочуларды тесттик режимде аралыктан добуш берүүгө катышууга чакырат

Тесттик добуш берүү “Дордой-плаза” жана “Азия-молл” сыяктуу соода борборлорунда да уюштурулат.

Буга чейин тесттик добуш берүү 10- жана 20-октябрда бүт өлкө боюнча жана Россия Федерациясынын айрым шаарларында өткөрүлгөн.

Жогорку Кеңештин депутаттарын мөөнөтүнөн мурда шайлоо 2025-жылдын 30-ноябрына дайындалды.

Жогорку Кеңештин депутаттарын шайлоону өткөрүү үчүн 30 көп мандаттуу шайлоо округу түзүлдү, алардын ар биринде Жогорку Кеңештин 3төн депутаты 5 жылдык мөөнөткө шайланат.

Мында шайлоочу өзүнүн тандоосу боюнча бир гана талапкерге добуш берүү укугуна ээ.

Жогорку Кеңештин 90 депутаты мажоритардык тутум боюнча көп мандаттуу шайлоо округдары боюнча шайланат.

Иллюстрациялык сүрөт: shailoo.gov.kg