Жалал-Абад шаары жана Сузак районунда өзгөчө абал киргизилет
- 5 лет мурун
Президент Сооронбай Жээнбеков бүгүн, 24-мартта Жалал-Абад шаарынын жана Сузак районунун аймагында өзгөчө абал киргизүү жөнүндө жарлыкка кол койду. Жарлык коронавирустун дүйнөдө күч алышынан жана Кыргызстанда катталышынан улам кабыл алынды.
Жалал-Абад шаарынын жана Сузак районунун аймагында 25-марттан саат 08.00дөн баштап 15-апрелине саат 08.00гө чейин өзгөчө абал киргизилсин.
Өзгөчө абал киргизилген мезгилде ички иштер министрлигинин экстремизмге жана мыйзамсыз миграцияга каршы аракеттенүү боюнча кызматынын начальниги Жеңишбек Жоробеков Жалал-Абад шаарынын жана Сузак районунун коменданты болуп дайындалды.
Өзгөчө абал режимин камсыз кылуу үчүн Жалал-Абад шаарынын жана Сузак районунун аймагында комендатура түзүлөт.
Бул тууралуу Президенттин басма сөз кызматы билдирди.
Кыргызстанда 22-марттан тартып бир айга өзгөчө кырдаал киргизилди.
Кыргызстанда коронавирус жуктурган 16 учур катталса, 24-мартка карата республика боюнча коронавирус инфекциясын жуктуруунун 26 жаӊы учуру катталды. Мындан улам, Кыргызстанда жалпы 42 адамда COVID-19 вирусу аныкталды.
Сүрөт: Интернет булактарынан.
