Жапония Орусиянын, Казакстандын жана Өзбекстандын 50дөн ашык компаниясына санкция салды

  • 4 недели мурун

Жапониянын тышкы иштер министрлиги Орусиянын 11 жаранына, ошондой эле Орусиянын, Кытайдын, Казакстандын, Өзбекстандын, Индиянын жана Бириккен Араб Эмиратынын 50дөн ашык компаниясына каршы санкциялар киргизилгенин жарыялады.

Санкциялык тизмеге «Уралвагонзавод» ишканасынын жетекчиси Александр Потапов, «Тактикалык ракеталык куралдар» корпорациясынын башкы директору Борис Обносов, Запорожье облусунун Орусия оккупациялаган бөлүгүнүн министри Елена Шапурова, Орусиянын Борбордук шайлоо комиссиясынын мүчөлөрү Эльмира Хаймурзина, Александр Курдюмов, Антон Лопатин жана башкалар кирди.

Ошондой эле Кытай, Казакстан, Өзбекстан, Индия жана Бириккен Араб Эмираттарында катталган 11 компанияга чектөө чаралары киргизилди. Алардын арасында Казакстандан Elem Group, Өзбекстандан Mvizion, Кытайдан Guangzhou Ausay Technology, Alpha Trading Investments жана Asia Pacific Links бар. Бул компаниялар Орусияга электроника сатып алууга жана санкциялардан качууга жардам берип жатканы айтылууда.

Май айында Жапония Түндүк Кореядан курал-жарак алып келгени үчүн бир орус жаранына, тогуз орусиялык жана эки кипрдик юридикалык жакка каршы санкция киргизген. Санкцияларга Орусиянын «224-учуу отряды» мамлекеттик авиакомпаниясы жана анын башкы директору Владимир Михейчик, «Трансморфлот», «М-Лизинг», «Азия», «Чыгыш Стивидоринг компаниясы», Дунай жээгиндеги деңиз-аскер ракеталык комплекси, №25969 аскер бөлүгү, «Владимировка» илим-изилдөө комплекси, «Ашулук» полигону кирген. Тизмеде Кипрде катталган IBEX Shipping жана Azia Shipping компаниялары да бар.

Сүрөт: president.kg

Муну бөлүшүү

Окшош жаңылыктар

Журналисттик иликтөөлөр

Помочь проекту

договором оферты