Жалал-Абад облусунда зыяндуу чегирткелер таралууда

Жалал-Абад облусунда зыянке чегирткелер таралууда. Бул тууралуу сууресурстары, айыл чарба жана кайра иштетүү министрлиги билдирди.    

Химиялаштыруу, өсүмдүктөрдү коргоо жана карантин департаментинин Жалал-Абад облусундагы башкармалыгынын маалыматына ылайык, бүгүнкү күндө 7 320 гектар аянтта зыяндуу чегирткенин таралышы катталды.

Быйыл зыянкечтер эрте пайда болгондуктан, адистер тарабынан 11 530 гектар жайыт аянты текшерүүдөн өткөрүлдү.

Дезинфекциялоо иш-чаралары Ала-Бука, Аксый, Ноокен, Базар-Коргон жана Сузак райондорунда 5 даана атайын техника менен аткарылууда.

Бүгүнкү күнгө карата 4 000 гектар аянт иштетилип, жакынкы күндөрү дагы 7 000 гектарды камтуу пландалууда.

Ошондой эле буга чейин Ош облусунун райондорунда да тиешелүү иштер жүргүзүлгөн.

Учурда кырдаал көзөмөлдө болуп, алдын алуу иш-чаралары улантылууда.

Республика боюнча бардык аймактарда көзөмөл күчөтүлгөн тартипте жүргүзүлүп жатканы айтылды.

Сүрөт: Айыл чарба министрлиги