Өзгөчө ири өлчөмдө баңгизат таратууга бөгөт коюлду

Улуттук коопсуздук мамлекеттик комитети (УКМК) тарабынан «Афган чарсы» аттуу баңги каражатын «Ооганстан–Тажикстан–Кыргызстан» багыты боюнча өзгөчө ири өлчөмдө таратуучу трансулуттук каналдын ишине бөгөт коюлду.

Бул тууралуу УКМК басма сөз кызматы билдирди.

Маалыматта айтылгандай, бул ишке байланыштуу Кыргыз Республикасынын жарандары, 1982-жылы туулган М.Д.Н. жана 1971-жылы туулган Н.А.К. кармалды.

Бул факты боюнча кылмыш-жаза кодексинин 282-беренесинин 3-бөлүгүндө каралган кылмыштын белгилери боюнча кылмыш иши козголду. Аталган берене баңги каражаттарын, психотроптук заттарды жана алардын аналогдорун мыйзамсыз даярдоо, сатып алуу, сактоо, ташуу жана сатуу максатында жөнөтүүгө байланыштуу аракеттерди камтыйт.

Текшерүү иштеринин жүрүшүндө Н.А.К. аттуу жаран тарабынан үй-бүлөлүк зомбулук фактылары аныкталды. Бул факты боюнча материалдар өзүнчө өндүрүшкө бөлүнүп, кылмыш иши козголду.

Учурда козголгон тергөө иш-чаралары жүргүзүлүүдө.

Сүрөт: УКМК