УКМК: Курал-жарак жана ок-дары сакталган жай табылды
- 3 года мурун
Чүй облусунун Кемин районунун аймагынан белгисиз үлгүдөгү тапанча, жылмакай сайлуу мылтык, Ф-1 кол гранатасы жана 5,6 ×15,6 мм R үлгүсүндөгү бир нече ондогон ок-дарылар сакталган жер табылды.
Бул тууралуу Улуттук коопсуздук боюнча мамлекеттик комитетинин (УКМК) басма сөз кызматы билдирди.
Алынган буюмдардын кайдан келгендигин жана бул жашыруун жайды уюштурган кишилерди аныктоо боюнча иш-чаралар жүргүзүлүп жатканы маалымдалды.
УКМК курал, ок-дарыларды, жардыргыч заттарды алуу, берүү, сатуу, сактоо, ташуу же алып жүрүү кылмыш-жаза жоопкерчилигине алып келерин эскертет.
Ок атуучу куралдарды, ок-дарыларды, жардыргыч заттарды укук коргоо органдарына өз ыктыяры менен тапшыргандар кылмыш жоопкерчилигинен бошотуларын эске салат.
Сүрөт: УКМК басма сөз кызматы.
