УКМК: «Хизб-ут-Тахрирдин» балдар менен иштеген мүчөсү кармалды

Улуттук коопсуздук боюнча мамлекеттик комитет (УКМК) Бишкекте «Хизб-ут-Тахрир» диний экстремисттик уюмунун балдар менен иштеген мүчөсү кармалганын билдирди.

Атайын кызматтан билдиришкендей, 6-декабрда баш калаанын Биринчи май райондук сотунун санкциясынын негизинде аталган уюмга мүчө деп шек саналган эки кишинин батиринде тинтүү жүргүзүлгөн.

24 жаштагы шектүүнүн үйүнөн «Хизб-ут-Тахрир» уюмуна таандык адабияттар, идеологиялык жазуулары бар материалдар табылган. 27 жаштагы шектүүнүн үйүндө балдарга диний билим берилип жатканы аныкталган.

«Тинтүү жүргүзүлгөн кезде батирде 10-17 жашка чейинки жети өспүрүм болгон. Алардын көбү эмгек мигранттарынын балдарды экени такталды», — деп айтылат маалыматта.

Балдарга окутуу уюштурган деп шектелген жаран УКМКнын убактылуу кармоочу жайына киргизилди. Ал окутуп жаткан өспүрүмдөр туугандарына өткөрүлүп берилди.

Сунни мусулмандарынын “Хизб-ут-Тахрир” уюму «ислам халифатын курууну көздөйт» мүнөздөлөт. Бул диний-саясий уюм бир катар мамлекеттерде, анын ичинде Кыргызстанда да «экстремисттик» деп табылып, 2003-жылы Жогорку соттун чечими менен ишмердигине тыюу салынган.