Сары-Кыр ашуусунда калган адамды куткарууга ӨКМдин тик учагы жөнөтүлдү

6-ноябрда Сары-Кыр ашуусунда калып калган жаранды эвакуациялоого Өзгөчө кырдалдар министрлигинин (ӨКМ) тик учагы учуп кетти.

Бул тууралуу ӨКМ билдирди.

Мындан сырткары таң эрте жеринде 28 адам (анын 16сы ӨКМ кызматкерлери), 6 техника издеп куткаруу иштерин аткарууда.

Маалыматта айтылгандай, 5-ноябрда Жалал-Абад – Казарман унаа жолунун Сары-Кыр ашуусунда 30 жаштагы К.Э. аттуу жаран автоунаасы менен кар күрткүсүнө тыгылып, жардам сураган.

Кечээ бул ашууга ӨКМдин Жалал-Абад облустук башкармалыгына караштуу Тогуз-Торо райондук өзгөчө кырдаалдар бөлүмүнүн 4 куткаруучусу, 4 милиция кызматкери, жергиликтүү бийлик өкүлдөрү жана “China Railway International” компаниясынан 4 адам жүктөгүч менен чыгышкан. ӨКМге караштуу республикалык өзүнчө куткаруу отрядынын куткаруучулары да тартылышты.

Кытайлык темир жолчулардын кошумча инженердик 2 оор техникасын жолду ачууга тартышкан.

Ашуудагы бул унаа жолу 2025-жылдын 1-октябрында Тогуз-Торо жана Сузак райондорунун акимдери чыгарган тескемелердин негизинде жабылган.