Министрлик: Нипах вирусунун коркунучуна байланыштуу санитардык-карантиндик көзөмөл күчөтүлдү

Саламаттык сактоо министрлиги тарабынан өлкө аймагына Nipah вирусунун кирип кетишине жол бербөө максатында «Манас» эл аралык аэропортунда санитардык-карантиндик иш-чаралар жүргүзүлдү.

Дарттын кезектеги очогу катталган Индиядан келген жүргүнчүлөргө өзгөчө көңүл бурулууда.

1-февралда Индиядан келген авиакаттам менен Кыргыз Республикасына 158 жүргүнчү учуп келди. Учурда республикалык карантиндик жана өзгөчө кооптуу инфекциялар борбору жана «Манас» аэропортунун санитардык-карантиндик пунктунун медицина кызматкерлери бирге күчөтүлгөн тартипте иш алып барышууда.

Калктын санитардык-эпидемиологиялык коопсуздугун камсыз кылуу максатында эл аралык каттамдар менен келген бардык жүргүнчүлөрдүн дене табын милдеттүү текшерүүдөн өткөрүлөт. Дене табы 37,5°С жана андан жогору болгон учурларда жүргүнчүлөр дароо изоляцияланып, белгиленген тартипте тиешелүү медициналык жардам көрсөтүлөт.

Учурда эпидемиологиялык кооптуу абал катталган жок, келген жүргүнчүлөрдүн ден соолук абалы канааттандырарлык деп бааланууда.

Бүгүн, 5-февралда, саламаттык сактоо министри Каныбек Досмамбетов нипах вирусу боюнча кабатырланууга негиз жок экенин билдирди.

Иллюстрациялык сүрөт: Интернет булактарынан