Курал-жарак жана ок-дары сатууга шектелип, 9 киши кармалды

Улуттук коопсуздук мамлекеттик комитети (УКМК) тарабынан Н.Т.З., М.Э.К., Н.К.А., Н.Т.Т., О.Б.Т., А.Т.Б., С.Р.Д. ошондой эле чек ара кызматынын азыркы жана мурдагы кызматкерлери Э.К.К. жана А.у.Н. кылмыштуу бүтүм менен РГД-5 согуштук гранаталарынын ири партиясын сатууну көздөгөндүгү аныкталганын 2-июлда билдирди.

Маалыматта айтылгандай, «уюшкан кылмыштуу топтун мүчөлөрү чек ара кызматынын кызматкерлери менен кылмыштуу бүтүмгө келип, Кыргыз Республикасы жана Тажикстан  Республикасы менен болгон куралдуу кагылышуу учурунда РГД-5 гранаталарын колдонуу шылтоосу менен, ишенип берилген мүлктү уурдап, кылмыштуу топтун мүчөлөрүнө сатып жибергени аныкталган. Кармалгандардын ар бири өздөрүнүн кылмыштуу милдеттерин ачык-айкын аткарышкан, бири кардарларды издөө менен алектенген, башкасы курал ташуу үчүн автотранспорт каражаттарын жана коопсуз кыймыл үчүн адистештирилген аскердик кийимдерди даярдоо болгон».

“Ыкчам-иликтөө иш-чараларынын натыйжасында курал-жарактарды жана ок-дарыларды мыйзамсыз жүгүртүүдөн 4 даана РГД-5 гранатасы, кесилген ок атуучу мылтык, 7,62 мм жана 5,45 калибрлүү ок-дарылар алынган. Ошол эле учурда кылмыш ишине тиешеси бар жалпысынан 9 адам кармалып, №21 тергөө абагына  киргизилди.Учурда бул кылмышка тиешеси бар бардык адамдарды аныктоо боюнча тиешелүү тергөө-ыкчам иш-чаралар жүргүзүлүүдө” деп айтылат маалыматта.