Касымалиев Астанада Казакстандын президенти Касым-Жомарт Токаев менен жолукту

Министрлер кабинетинин төрагасы Адылбек Касымалиев Астана шаарында Казакстандын президенти Касым-Жомарт Токаев менен жолукту. 

Бул тууралуу Министрлер кабинетинин сайтында маалымат берилди.

Жолугушуунун жүрүшүндө буга чейин жетишилген саясий, соода-экономикалык, суу-энергетика, маданий-гуманитардык жана башка тармактар боюнча кызматташууну тереңдетүү жана ишке ашыруу маселелери каралды. 

Ошондой эле кыргыз-казак мамлекеттик чек арасында электрондук кезек системасын киргизүү, өткөрүлүп жаткан жүктөрдү текшерүүнү жеңилдетүү, кошумча Кичи-Капка – Бесагаш жана Камышановка – Ак-Суу өткөрүү пункттарын ачуу иштери тууралуу сүйлөшүү болду. 

Сүйлөшүүнүн жыйынтыгында буга чейинки макулдашууларды ишке ашырууну жана аны бекемдөө макулдашылды.

Адылбек Касымалиев буга чейин Казакстан премьер-министри Олжас Бектенов менен жолугушту.

24-25-февралда Министрлер кабинетинин төрагасы Касымалиев расмий сапар менен Астана шаарына барары маалымдалган.

Ал Казакстандын премьер-министри Олжас Бектенов менен жолугуп, кызматташуу маселелерин сүйлөштү. Мындан тышкары “Казакстан Гарыш Сапары» улуттук космос борбору, санариптик өкмөт кеңсеси сыяктуу бир катар объекттердин иши менен таанышты.

Сүрөт: gov.kg