Кар көчкү алдында калгандар изделүүдө   

14-февралда «Түндүк-түштүк» (Балыкчы-Казарман-Жалал-Абад) альтернативдик унаа жолунун 326-чакырымынан 346-чакырымына чейинки аралыкта 25 жерден кар көчкү түшүп, (8 чоң, 17 кичи) “Чайна Роуд” ишканасынын 4 кызматкерин басып калган. Алар дагы эле изделүүдө.

Бул тууралуу өзгөчө кырдаалдар министрлигинин (ӨКМ) басма сөз кызматы билдирди.

Кырдаалга байланыштуу Президенттин Жалал-Абад облусундагы ыйгарым укуктуу өкүлү — Жалал-Абад облустук жарандык коргонуунун башчысынын буйругуна ылайык, Сузак жана Тогуз-Торо райондорунун аймагына IV даражадагы «Өзгөчө кырдаал» режими киргизилген.

Маалыматка ылайык, кар көчкү түшкөн аймакта 4 адам (1998-жылы туулган К.А.; 1978-жылы туулган С.С.; 1979-жылы туулган Х.Я.; 1987-жылы туулган Л.Д.) дайынсыз болууда. Алардын ичинен үчөө Кытай жараны экендиги белгилүү болду.

ӨКМдин Сузак райондук бөлүмүнүн кызматкерлери жана Таш-Көмүр шаарындагы 2-өзүнчө издөө-куткаруу отрядынан 10 куткаруучу жана ӨКМдин алдындагы гидрометеорология агенттигинин 4 кызматкери, ошондой эле дайынсыз болгон (1998-жылы туулган К.А.) аттуу жарандын туугандарынан 30 жаран, Сузак РИИБнөн 8 кызматкер, “Чайна Роуд” ишканасынан 20 кызматкер тартылып, издөө иштери уланууда,- деп билдирди ӨКМ басма сөз кызматы.

Ал эми кар көчкү алдында калгандар эмнеге табылбай жаткандыгын айтып, жергиликтүү калк нааразы болууда.