Кайра шайлоо: Талапкерлерди каттоо үчүн документтерди кабыл алуу аяктады

Борбордук шайлоо комиссиясы (БШК) Бишкектеги №27 Биринчи май жана №29 Свердлов округдары боюнча Жогорку Кеңештин депутаттарын кайра шайлоого 37 талапкерди каттады. Бул тууралуу БШКнын басма сөз кызматы кабарлады.

Маалыматка караганда, талапкерлерди каттоо үчүн документтерди кабыл алуу 30-январда аяктады. Арыз жазган 72 кишинин 55и керектүү документтер топтомун тапшырып үлгүргөн. Тогуз талапкер шайлоого катышуудан баш тартуу жөнүндө арыз берди (алардын бирөө – катталган талапкер). Боршайком бир талапкерди каттоодон баш тартты. Калганы документтерди тапшырган эмес. Ушул тапта 18 талапкердин каттоого берген документтери каралууда.

Буга чейин Борбордук шайлоо комиссиясы 20-январдагы отурумунда экс-депутат Рыскелди Момбековду Бишкектин №27 Биринчи май шайлоо округунан депутаттыкка талапкер кылып каттоодон баш тарткан.

Бул эки округда 2020-жылдын 28-ноябрындагы шайлоодо баарына каршы бергендер көп болгондуктан быйыл 27-февралга кайра шайлоо дайындалган.