Ишкер Имамидин Ташовдун иши сотко өткөнү айтылды

Ишкер Имамидин Ташовдун иши тергелип бүтүп, Бишкектин Биринчи Май райондук сотуна өттү. Бул тууралуу «Азаттык» анын адвокаты Самат Матцаковго шилтеме берип, жазып чыкты.

Маалыматка ылайык, Имамидин Ташов Кылмыш-жаза кодексинин 326-беренеси (Бийликти күч менен басып алуу), 327-беренеси (Бийликти күч менен басып алууга ачык чакырыктар) жана 378-беренеси (Мамлекеттик чек арадан мыйзамсыз өтүү) менен айыпталууда.

Баштапкы соттук угуу 23-август, саат 15:30га белгиленген. Сот жабык өтүп, ишти судья Чынгызбек Бердимуратов караары белгилүү болду.

Эскерте кетсек, Имамидин Ташовду Улуттук коопсуздук боюнча мамлекеттик комитет (УКМК) 22-апрелде кармаган. Анда УКМК: «Ташов Кыргызстан жана Казакстандын Республикасынын мамлекеттик чек араларын Алматы шаарынан Кара-Балта шаарына чейин мыйзамсыз кесип өтүп, бийликти басып алуу максатында каршылык акциясын өткөрүү үчүн күчтөрдү бириктирүү боюнча убактылуу штаб уюштурууну пландап жаткан жеринен кармалды»,-деп маалымат берген эле.

Сүрөт: интернет булактары