ИИМ: 15 жашар кыздын иши боюнча дагы төрт кыз кармалды

Ички иштер министрилиги (ИИМ) Ош шаарынын 15 жаштагы тургуну кабылган зомбулук ишине байланыштуу толук маалымат берип, шектүү катары дагы төрт кыз кармалганын билдирди.

Министрликтин берген маалыматында, 23-августта ИИМдин Кылмыш иликтөө башкы башкармалыгына ыкчам маалымат түшүп, анда 15-август күнү Ош шаарынын тургуну болгон 15-жаштагы кызды топ кыздар Кара-Суу районундагы каналга алып барып, эч себепсиз уруп, чачын жана кашын кырып, андан кийин күч колдонуп белгисиз даректе кармап отургандыгы айтылган.

Текшерүүнүн жыйынтыгында 15-жаштагы кызды топ кыз-балдар өмүрүнө жана ден соолугуна залал келтирген зомбулук көрсөтүшүп, шантаж жолу менен сойкулук кылууга мажбурлашканы белгилүү болгон.

Аталган факт боюнча Кылмыш-жаза кодексинин 159-беренесинин (Сойкулук кылууга тартуу) негизинде кылмыш иши козголгон. Ошондой эле ИИМ окуянын бардык катышуучулары аныкталып, тергөө кызматына алынып келингенин билдирди.

Тергөөнүн жыйынтыгында кылмышка шектүү катары 2003-жылы туулган Э.Б., 2001-жылы туулган К.М., 2004-жылы туулган Ш.Н. жана 2006-жылы туулган М.М. кармалып, убактылуу кармоо жайына киргизилген.

Сүрөт: ИИМдин басма сөз кызматы