Германиядагы элчилик кызматкерлери атайын Олимпиада оюндарынын ачылышына катышты
- 1 год мурун
17-июнда Кыргыз Республикасынын Германиядагы элчилигинин кызматкерлери Германиядагы кыргыз диаспорасынын өкүлдөрү жана активисттери менен бирге Берлиндеги Олимпиада стадионунда өткөн 2023-жылкы атайын Олимпиада оюндарынын салтанаттуу ачылыш аземине катышты.
Бул тууралуу тышкы иштер министрлигинин басма сөз кызматы билдирди.
Бул масштабдуу спорттук иш-чарага Кыргыз Республикасынан 9 адамдан турган курама команда келди, анын ичинен — 6 атлет. Бул таланттуу спортчулар Кыргызстандын атынан бадминтон, пауэрлифтинг жана стол тенниси сыяктуу спорттун түрлөрү боюнча катышат.
Маалымат үчүн: 2023-жылкы атайын Олимпиада оюндары Германиядагы 1972-жылкы Мюнхен Олимпиадасынан берки эң ири спорттук иш-чара болуп саналат. 18-25-июнь күндөрү дүйнөнүн 190 өлкөсүнөн келген миңдеген интеллектуалдык жана көп майыптыгы бар спортчулар спорттун 26 түрү боюнча күч сынашат.
Берлинде өтүп жаткан Дүйнөлүк Атайын Олимпиада оюндарынын урааны — #ZusammenUnschlagbar #UnbeatableTogether #Биргебизжеңилбеспиз. Бул спорттун бириктирүүчү күчү аркылуу инклюзивдик коомду түзүү идеясын билдирүүгө багытталган.
Сүрөттөр: ТИМ басма сөз кызматы
