Чолпонбай Түлөбердиев атындагы сейил бакта «Эстелик оту» акциясы өттү

Кечээ, 6-майда, Советтер Союнунун баатыры Чолпонбай Түлөбердиев атындагы сейил багында «Эстелик отун» өткөрүп берүү иш-чарасы өттү.

Бул тууралуу Бишкек мэриясы билдирди.

Иш-чарага Бишкек шаарынын мэри Айбек Жунушалиев, коомдук жана ардагерлер уюмдарынын өкүлдөрү, ошондой эле борбордун тургундары катышты.

Аземдин алкагында митинг өткөрүлүп, Улуу Ата- Мекендик согуштун баатырларынын урматына гүлчамбар коюлду.

«Эстелик оту» салынган шам чырак Чолпонбай Түлөбердиев атындагы музейге салтанаттуу түрдө өткөрүлүп берилди.

Акция 5-май күнү Александров багында башталган. Катышуучулар Түбөлүк оттун бир бөлүгүн дүйнөнүн 14 өлкөсүнө жеткирүүнү пландаштырууда. Бишкекке «Эстелик отун» Олимпиада чемпиону, белгилүү теле алып баруучу, актриса жана Москва шаардык думасынын депутаты Мария Киселева алып келди.

Иш-чара Россиянын кызматташтык, элдик фронт ардагерлер жана ыктыярчылар уюмдарынын колдоосу менен уюштурулган.

Жеңиштин 81 жылдыгынын урматына Бишкек шаарында бир катар иш-чаралар өткөрүлөт. Бул тууралуу Бишкек мэриясы билдирди.

Сүрөттөр: bishkek.gov.kg