Бишкекте ШКУга мүчө мамлекеттердин башчыларынын кеңешинин жыйыны өттү

Президент Садыр Жапаров бүгүн, 1-сентябрда, Бишкек шаарында төрагалык кылуучу катары Шанхай кызматташтык уюмуна мүчө мамлекеттердин башчыларынын кеңешинин жыйынын ачты.

Бул тууралуу президенттин сайтында маалымдалды.

Жыйында мүчө мамлекеттердин алдында турган актуалдуу маселелер талкууланып, келечектеги өз ара аракеттенүүнүн негизги багыттары аныкталып, ШКУнун ишмердүүлүгүн мындан ары өркүндөтүүгө багытталган маанилүү чечимдер кабыл алынды.

Маалыматта айтылгандай, Садыр Жапаров Кыргыз Республикасынын атынан төмөнкү маселелерге өзгөчө көңүл бурууну сунуштады.

“Биздин Уюм мындан ары да блоктук ой жүгүртүүдөн жана тирешүүдөн эркин болуп, ишенимди бекемдөө, тынчтыкты жана туруктуулукту камсыз кылуу үчүн аянтча болуп кызмат кылышы керек” деп баса белгиледи президент.

Экинчиден, коопсуздуктун натыйжалуу жана ажырагыс системасын түзүү зарыл.

Президент ШКУга мүчө мамлекеттердин коопсуздук чакырыктарына жана коркунучтарына каршы аракеттенүү боюнча универсалдуу борборду тез арада ишке киргизүүгө өзгөчө маани берди.

Бул контекстте Бишкек шаарында Эл аралык уюшкан кылмыштуулукка каршы аракеттенүү борборунун ишин баштоо үчүн бардык зарыл шарттар түзүлгөнү билдирилди.

Үчүнчүдөн, Мамлекет башчысы экономикалык кызматташтыкты жаңы сапаттык деңгээлге өткөрүүнүн зарылдыгын айтты.

Садыр Жапаров ШКУнун Өнүктүрүү банкын түзүү маселесин практикалык жактан чечүүнүн маанилүүлүгүнө токтолуп, мүчө мамлекеттерди жана ишкер чөйрөлөрдү биргелешкен долбоорлорду ишке ашыруу үчүн үстүбүздөгү жылдын июль айында Ысык-Көл облусунда ачылган “Тамчы” атайын финансылык-инвестициялык аймагынын мүмкүнчүлүктөрүн пайдаланууга чакырды.

Андан ары мамлекет башчы транспорттук-логистикалык өз ара байланыштуулукту чыңдоонун маанилүүлүгүн белгилеп, бул багыттагы иш жүзүндөгү эң маанилүү кадам катары “Кытай – Кыргызстан – Өзбекстан” темир жолун куруу долбоорун атады.

Мындан тышкары, ШКУнун маданий-гуманитардык негизин бекемдөөнүн маанилүүлүгү белгиленди.

Жыйындын жүрүшүндө ШКУнун бирдиктүү технологиялык мейкиндигин түзүүнүн зарылдыгы да айтылды.

Мамлекет башчылары эл аралык жана регионалдык күн тартибиндеги актуалдуу маселелер боюнча мазмундуу пикир алмашып, Уюмду мындан ары өнүктүрүү, коопсуздукту чыңдоо, экономикалык жана маданий-гуманитардык кызматташтыкты кеңейтүү маселелерин талкуулашты.

Сөзүнүн соңунда Садыр Жапаров төрагалык кылуу эстафетасын Пакистанга өткөрүп берди.

Андан ары жыйында Беларустун президенти Александр Лукашенко, Индиянын премьер-министри Нарендра Моди, Ирандын президенти Масуд Пезешкиан, Казакстандын президенти Касым-Жомарт Токаев, Кытайдын төрагасы Си Цзиньпин, Пакистандын Ислам премьер-министри Мухаммад Шахбаз Шариф, Россиянын президенти Владимир Путин, Тажикстандын президенти Эмомали Рахмон, Өзбекстандын Президенти Шавкат Мирзиёев, ошондой эле ШКУнун башкы катчысы Нурлан Ермекбаев жана Аймактык антитеррордук түзүмдүн аткаруу комитетинин директору Уларбек Шаршеев өздөрүнүн иштери тууралуу тиешелүү баяндамаларды сунушташты.

Жыйындын жыйынтыгы боюнча 28 документ кабыл алынып, кол коюлду.

Сүрөт: president.kg