Адам өлтүрүүгө шектелип, издөөдө жүргөн жаран 11 жылдан кийин Орусиядан кармалды

Кыргызстанда адам өлтүрүүгө шектелип, издөөдө жүргөн жаран 11 жылдан кийин Орусиянын аймагынан кармалды. Бул тууралуу Кыргызстандын Ички иштер министрлигинин басма сөз кызматы кабарлады.

ИИМден билдиришкендей, 2010-жылдын 17-июнунда Ош облусунун Араван райондук милициясынын нөөмөт бөлүмүнө азиат улутундагы, болжол менен 25-30 жаштардагы белгисиз аялдын жансыз денеси Дадахан айылынын пахта талаасындагы каналдын жээгинен табылгандыгы тууралуу маалымат түшкөн.

Маркумдун өздүгүн аныктоо максатында жүргүзүлгөн тийиштүү иш-аракеттердин негизинде анын Мамлекеттик каттоо кызматынын Транспорттук каражаттарды каттоо департаментинин кызматкери 1980-жылы туулган Алия Темирбаева экендиги аныкталган.

Алгач маркум 2010-жылдагы июнь окуясынын кесепетинен каза болгон деп божомолдонгон.

Бирок тергөө-ыкчам иш-аракеттеринин жүрүшүндө адам өлтүрүүнүн жагдайлары аныкталган.

Тактап айтканда, бир-нече адамдан турган кылмыштуу топ 2010-жылдын 10-июнунда маркум А.Темирбаеваны Ош шаарынын четине алдап алып барышып, ал жерден күч колдонуп сабап, электрошокердин жардамы менен коркутуп, 10 миң доллар талап кылышкан.

Кылмышкерлер көздөгөнүнө жетпей, А.Темирбаеванын алтын-күмүш зергер буюмдарын алышып, колу-бутун байлап, Кара-Суу районундагы каналга ыргытып жиберишкени аныкталган.

Тергөө-ыкчам иш-аракеттеринин жүрүшүндө кылмышка тиешеси бар адамдар кармалып, сот тарабынан алардын бири 25 жылга, экинчиси 18 жылга эркинен ажыратылса, дагы бирөөсү оор кылмышты жаап жашыргандыгы үчүн 3 жылга эркинен ажыратылган.

Ошондой эле бул оор кылмыштын активдүү шериктеринин бири изин жашырып качып кетүүгө үлгүргөн. Ага карата мамлекеттер аралык издөө жарыяланган.

2022-жылдын январь айында Араван райондук милициянын кызматкерлеринин ыкчам маалыматынын негизинде издөөдө жүргөн адамдын жүргөн жери аныкталып, бул тууралуу ИИМдин Россия Федерациясындагы Өкүлчүлүгүнүнө тийиштүү маалымат жиберилген.

2022-жылдын 21-январында издөөдө жүргөн жаран — Ош облусунун тургуну 1988-жылы туулган Айтиев Тилек Москва шаарында кармалган.

Учурда шектүүнү Кыргызстанга экстрадициялоо маселеси каралып жатат.