​Дастан Бекешев бир мандаттуу округдан келерки парламент депутаттыгына талапкер болду

Шайлоо жана референдум өткөрүү боюнча борбордук комиссиясына (БШК) 5-октябрга карата бир мандаттуу шайлоо округдарынан Жогорку Кеңеш депутаттыгына 108 талапкерден арыз түштү.

Кийинки арыз бергендердин катарында Жогорку Кеңештин депутаттары Дастан Бекешов, Камчыбек Жолдошбаев бар.

Ага чейин Дастан Жумабеков, Искендер Матраимов, мурдагы ИИМ министри Мелис Турганбаев, Акылбек Сариев, Арсланбек Малиев, Юлия Лилиенталь, Жусупжан Жээнбеков, Тазабек Икрамов, Автандил Кулбараков, Саматбек Ибраев, Эркин Бөлөкбаев, Акбөкөн Таштанбеков, Элмурза Сатыбалдиев, Атыр Абдрахматова, Азизбек Турсунбаев, Канат Хасанов, Канат Сагымбаев, Райымберди Дүйшөмбиев, Алмазбек Баатырбеков, Алтынбек Сулайманов, Бактыбек Райымкулов жана башкалар тизмеде аталган.

Жалпысынан арыз бергендердин арасынан экөө саясий партиянын атынан. «Альянс» аттуу саясий партиядан Ноокат округунан Алтынбек Сулайманов жана Чүй-Кемин округунан Тарыкбаев Алмаз көрсөтүлдү. Калгандары өзүн-өзү көрсөтүштү.

Президент Садыр Жапаровдун жарлыгы менен 2021-жылдын 28-ноябры Жогорку Кеңеш депутаттарын шайлоо күнү деп белгиленген.

Жогорку Кеңештин 54 депутаты пропорционалдык система боюнча (саясий партиялардын талапкерлеринин ачык тизмелери боюнча), 36 депутат бир мандаттуу шайлоо округдарында мажоритардык система боюнча шайланат.

Пропорционалдык система боюнча шайлоого катышуу ниетин билдирип, 75 партия арыз берген. Алардын канчасы каттоодон өтүп, шайлоого катышары азырынча анык эмес.

Сүрөт: Интернет булактарынан.