​Ат-башылыктар каршы чыгышса, соода-логистикалык борбор Балыкчыга курулат

Президент Садыр Жапаров ушул жумада Нарын облусуна иш сапары менен барган.

Анда Ат-Башы районунун тургундары менен да жолугушкан.

Ат-башылыктар менен баарлашууда Президент район аймагына соода-логистикалык борборун куруу боюнча оюн айтып, эгер жергилкитүү эл бул долбоорго каршы чыкса, башка жакты да караштыраарын кошумчалаган.

«Турмуш» басылмасынын жазганына караганда, соода-логистикалык борбордун курулушуна Ат-Башы районунун жашоочулары макулдугун беришкен.

Садыр Жапаров: «Экинчи вариантты дагы карап көрдүм, эгерде эл Ат-Башыга курууга каршы болуп туруп алышса, анда Балыкчыга салалы деген маселени караганбыз. Бирок, Ат-Башынын эли «Бул жерге эле сала бергиле. Бизге жумушчу орундар керек. Балдарыбыз иштеши керек. Ал логистикалык борбор биз үчүн түбөлүк иштеши керек» деген ойлорун айтышты. Эгер ал соода-логистикалык борбор салынып калса, 25 миңден 30 миңге чейинки жумушчу орун пайда болот. Ал жерде 95 пайыз кыргызстандыктар иштейт. Муну биз, өкмөт толугу менен көзөмөлгө алабыз» — деген.

Эске сала кетсек, бул демилге мурунку бийлик тушунда да көтөрүлүп, бирок жергиликтүү элдин массалык нааразычылыгынан улам долбоор башталбай жатып жабылган.

Фото интернеттен алынды