​Салык кызматы: Чек ара аймагындагы эмгек мигранттары патенттин негизинде иштей алышат

Өкмөттүн 2021-жылдын 12-мартындагы токтомунун негизинде, чек ара аймактарында эмгек ишин жүргүзгөн эмгек мигранттарына салык салуу жол-жоболорун жөнөкөйлөтүү максатында өкмөттүн «Ыктыярдуу патенттин негизинде салыктын базалык суммасын бекитүү жөнүндө» токтомуна өзгөртүүлөр киргизилди.

Ага ылайык, Кыргыз Республикасынын жарандары өсүмдүк өстүрүү, курулуш жана мал чарба, ошондой эле жекече тейлөө боюнча башка кызматтарды көрсөтүү жааттарында иштөө үчүн жалдаган, чек ара аймактарында жекече эмгек ишин жүргүзгөн эмгек мигранттары ыктыярдуу патенттин негизинде иштей алышат.

Чек арадагы эмгек-мигранттары Кыргыз Республикасынын аймагында патенттин негизинде визасыз режимдин колдонуу мөөнөтү ичинде Кыргыз Республикасынын салык салуу жана тышкы эмгек миграциясы чөйрөлөрүндөгү мыйзамдарына ылайык, жеке эмгек ишин жүргүзө алат.

Кыргыз Республикасына жеке эмгек ишин жүргүзүү максатында келген чек арадагы эмгек мигранттары үчүн визасыз режимдин колдонуу мөөнөтү ичинде эмгек визасын алуу талап кылынбайт.

Мындан тышкары, ыктыярдуу патенттин негизиндеги иштин түрлөрүнүн тизмесине курьердик иш кызмат көрсөтүү да киргизилди.

Сүрөт: Интернет булактарынан.