​Жейми Флай “Эркин Европа / Азаттык” радиосун кайра жетектейт

“Эркин Европа / Азаттык” радиосунун директорлор кеңеши Жейми Флайды медиакорпорациянын президенти жана башкы аткаруучу директору кылып кайрадан дайындады. Ал 16-февралда кызматына киришет. 2020-жылы июнда кызматынан кеткен Флай “Азаттыкты” кайра башкарат.

“Эркин Европа / Азаттык” радиосунун президенти Жейми Флай биринчи жолу 2019-жылы августта бул кызматка дайындалган. Кийин АКШнын глобалдык медиа боюнча агенттигинин жетекчиси Майкл Пактын чечими менен кызматтан алынган.

Жейми Флай – тышкы саясат боюнча адис. Ал АКШдагы Герман Маршалл атындагы фонддо, Конгрессте иштеген. Улуттук коопсуздук боюнча кеңеште, Коргоо министрлигинде ар кандай жетекчилик кызматтарды аркалаган.

”Эркин Европа/Азаттык” радиосу коммерциялык эмес медиакорпорация жана өзүнүн ар кандай платформадагы (Интернет, радио, телевидение, видео) берүүлөрүн дүйнөнүн 22 өлкөсүндө таратат. Корпорацияны АКШнын Конгресси каржылайт.

Булак: Борбор Азия жаңылыктар кызматы.

Сүрөт: Интернет булактарынан.