15-июндан тартып адал-индустрия чөйрөсүндөгү укук бузуулар үчүн өзгөртүүлөр күчүнө кирет

Экономика жана коммерция министрлигинде адал (халал) индустрия чөйрөсүнө тиешелүү Укук бузуулар жөнүндө кодекске киргизилген өзгөртүүлөрдүн күчүнө киришине байланыштуу кеңешме өткөрүлдү.

Киргизилген өзгөртүүлөрдүн негизги максаты халал-продукция рыногундагы ак ниетсиз аракеттерге, анын ичинде халал сертификаттарын жасалмалоого, маркировканы бурмалоого жана керектөөчүлөрдү адаштыруунун башка түрлөрүнө каршы аракеттенүү болуп саналат.

Анда төмөнкү укук бузуулар үчүн административдик жоопкерчиликти карайт:

-Айыл чарба жаныбарларын багууда жана союуда, ошондой эле алардан алынган продукцияны жана чийки затты өндүрүүдө, жыйноодо, кайра иштетүүдө, даярдоодо, сактоодо, ташууда жана жүгүртүүгө чыгарууда халал-продукцияга карата техникалык регламенттерде жана стандарттарда белгиленген талаптарды бузуу —жеке жактарга 75 эсептик көрсөткүч өлчөмүндө, юридикалык жактарга 230 эсептик көрсөткүч өлчөмүндө айып пул салынат;

-Адал-продукцияны өндүрүүдө пайдаланылуучу айыл чарба жаныбарлары жана балыктар үчүн тоюттарга карата талаптарды бузуу — жеке жактарга 75 эсептик көрсөткүч өлчөмүндө, юридикалык жактарга 230 эсептик көрсөткүч өлчөмүндө айып пул салынат;

-Техникалык регламенттерде жана халал-продукция боюнча стандарттарда белгиленген талаптарга шайкештигин тастыктаган документтери жок халал-продукцияны жүгүртүүгө чыгарууга байланыштуу укук бузуу — жеке жактарга 75 эсептик көрсөткүч өлчөмүндө, юридикалык жактарга 230 эсептик көрсөткүч өлчөмүндө айып пул салынат;

-Техникалык регламенттерде жана халал-кызмат көрсөтүүлөр боюнча стандарттарда белгиленген талаптарга шайкештигин тастыктаган документтери жок халал-кызмат көрсөтүүлөрдү жүзөгө ашырууга байланыштуу укук бузуу —жеке жактарга 75 эсептик көрсөткүч өлчөмүндө, юридикалык жактарга 230 эсептик көрсөткүч өлчөмүндө айып пул салынат;

-Халал-продукциянын жана халал-кызмат көрсөтүүлөрдүн шайкештигин тастыктоо жол-жоболорун жүргүзүү эрежелерин бузуу, ошондой эле милдеттүү жол-жоболорду өткөрбөстөн халал-продукциянын жана халал-кызмат көрсөтүүлөрдүн шайкештигин тастыктаган документтерди берүү — юридикалык жактарга 650 эсептик көрсөткүч өлчөмүндө айып пул салууга алып келет.

Иллюстрациялык сүрөт: Интернет булактарынан