​Баткен районунун прокурорунун орун басары пара менен кармалды

Улуттук Коопсуздук мамлекеттик комитети Баткен райондук прокурорунун орун басары Т.Т. пара талап кылып жаткандыгы боюнча фактысын аныктады.

Бул тууралуу УКМК басма сөз кызматы кабарлады.

2019-жылдын 13-январында Баткен шаарынын ИИБ тарабынан Өзбекстандын жарандары У.Н. жана А.Ф. ижарага алган үйдө өрт чыккан фактысы боюнча сотко чейинки иш катталган.

Соттук-өрт-техникалык экспертизанын жыйынтыгы боюнча өрттүн себеби электр зымдарынан деп табылган.

2019-жылдын 2-февралында бул факт боюнча Баткен шаарынын ИИБ КР Жазык-процесстик кодексинин 26-беренесинин 2-п. 1-б. боюнча (кылмыш курамынын жоктугу) жана ошондой эле 27-февралда кабыл алынган чечимдин мыйзамдуулугун жана негиздүүлугүн аныктоо үчүн Баткен райондук прокуратурасына өткөрүлгөн.

Бул материалды кароо Баткен райондук прокурорунун орун басарына тапшырылган.

2019-жылдын 12-мартында Т.Т. материалдык баюу максатында Өзбекстан жараны У.Н. жумуш кылганга уруксат берүүчү документтери жок деген шылтоо менен чакырып, маселени оң жагына чечип берүү үчүн 30 миң сом талап кылгын.

14-мартта У.Н. Башкы прокуратурага кайрылган арызынын негизинде КР Кылмыш-жаза кодексинин 326-беренесинин 1-бөлүмү боюнча сотко чейинки өндүрүш Кылмыштардын жана жоруктардын бирдиктүү реестрине катталып, иликтөө иштери КР УКМК Башкы тергөө башкармалыгына өткөрүлгөн.

2019-жылдын 16-мартында Башкы прокуратуранын өздүк коопсуздук жана ички тергөө бөлүмү тарабынан биргеликте өткөрүлгөн иш-чаранын жүрүшүндө, Баткен райондук прокуратурасынын орун басары Т.Т. 20 миң сом пара алып жаткан жеринен кармалды.

Кармалган жаран УКМК тергөө-камак жайына киргизилди. Тергөө жүрүп жатат.