​Бишкек мэриясы мектептерди оффлайн-режимге өткөрбөй турууну чечти

Жаңылыктар

Бишкек мэриясы азырынча баш калаанын мектептериндеги айрым класстар менен бала бакчаларды кадимки режимдеги иш тартибине кайтарбай туруу чечимин кабыл алды.

Бул тууралуу мекеменин басма сөз кызматы билдирди.

Мындай чечим социалдык маселелер боюнча вице-мэр Айжан Чыныбаева жетектеген эпидемияга жана эпизоотикага каршы шаардык комиссия эпидемиологиялык абалга мониторинг жүргүзгөндөн кийин кабыл алынды. Чечимге ылайык, 1-5-9-11-класстардын окуучулары гана мектептерге барып билим алышат.

Буга чейин мэрия бала бакчалардын ишин 20-январдан, мектептердеги бардык класстардын окуусун 1-февралдан тартып кадимки режимге өткөрүү планын билдирген.

Кыргызстанда 22-марттан баштап карантиндик чектөөлөр киргизилген. Чектөөлөрдүн негизинде, өлкө ичиндеги бардык социалдык жана экономикалык кыймыл-аракеттер токтотулуп, бул абал 10-майга чейин уланган

Коронавирус пандемиясына байланыштуу Кыргызстанда мектептер жана бала бакчалар 2020-жылдын март айынан тартып карантинге жабылган. Мектептер 4-чейректи аралыктан окуу менен аяктап, быйылкы жаңы окуу жылын да онлайн системада окуу менен улантышкан. Экинчи чейректен тартып айрым жашыл аймактагы мектептерге 1,5,9,11-класстарга салттуу түрдө окутууга уруксат берилген.

Сүрөт: Интернет булактарынан.