Кореялык адистер менен жогорку технологиялык медицина жаатында кызматташуу талкууланды

Министрлер кабинетинин төрагасы Адылбек Касымалиев жогорку технологиялык медицина тармагында эки тараптуу кызматташуунун келечегин талкуулоо үчүн Кореядан келген адистердин делегациясын кабыл алды. 

Бул тууралуу МинКаб сайтында маалымдалды.

Жолугушуунун жүрүшүндө Министрлер Кабинетинин башчысы саламаттыкты сактоо тармагын модернизациялоо жана дарылоонун инновациялык стандарттарын киргизүү мамлекеттин артыкчылыктуу милдеттеринин бири экенин баса белгиледи. 

Ал медициналык инновациялар жаатында дүйнөлүк лидер деп таанылган Корея Республикасынын алдыңкы тажрыйбасы Кыргызстандын стоматологиялык кызматын өркүндөтүү үчүн өзгөчө кызыгууну жаратаарын белгиледи. 

Жолугушуунун катышуучуларынын негизги көңүлү заманбап технологияларды өткөрүп берүү жана клиникалык практикага санариптик чечимдерди интеграциялоо маселелерине бурулду. Айрыкча, тараптар ата мекендик клиникаларга 3D-моделдөө системаларын жана жогорку тактыктагы имплантологияны киргизүү мүмкүнчүлүктөрүн, ошондой эле медициналык мекемелерди акыркы муундагы жабдуулар менен комплекстүү кайра жабдуунун келечегин талкуулашты.  Кореялык делегациянын өкүлдөрү медициналык сектордогу сапаттуу өзгөрүүлөргө кыргыз тараптын ачыктыгын белгилеп, активдүү өнөктөштүккө жана техникалык жардамга даяр экендиктерин билдиришти