Каракол — Эңилчек унаа жолуна кар көчкү түшүп, жол убактылуу жабылды
- 1 месяц мурун
Бүгүн, 10-декабрда, Ысык-Көл облусунун Ак-Суу районуна караштуу Каракол — Эңилчек унаа жолуна кар көчкү түшүп, жол убактылуу жабылды.
Бул тууралуу Транспорт жана коммуникациялар министрлигинин маалымат кызматы кабарлады.
Азыркы тапта аймакты караган №11 жол тейлөө ишканасы тарабынан тазалоо иштери жүрүп жатат. Көчкү жолдун 76-81-82-чакырымдар аралыгына 6 жерден түшкөн.
Учурда Каракол-Эңилчек унаа жолунун Чоң-Ашуу ашуусунда бороон болууда.
Транспорт жана коммуникациялар министрлиги тоолуу аймактар жана ашуулар аркылуу жол тарта турган айдоочуларды жол эрежелерин так сактоого чакырат.
Кыргызгидромет кызматы билдиргендей, бүгүн, 10-декабрда, Чүй, Ош, Баткен, Ысык-Көл, Нарын облустарынын көпчүлүк аймактарында, Талас, Жалал-Абад облустарынын айрым жерлеринде кар жаайт.
Сүрөт: mtd.gov.kg
