Бишкектин борбордук бөлүгүндө митингге тыюу салуу мөөнөтү узартылды

Бишкек шаарынын борбордук бөлүгү тарабында митинг өткөрүүгө тыюу салуу мөөнөтү 2023-жылдын 1-июлуна чейин узартылды.

Бул тууралуу Биринчи май райондук сотунун басма сөз кызматынан билдиришти.  

Анда Бишкек мэриясынын Биринчи май райондук акимчилигинин 31-марттан баштап тынч митингдерди өткөрүүгө тыюу салуу тууралуу арызы канаттандырылганы айтылат.

Бишкек шаарынын төмөнкү жерлеринде митинг өткөрүүгө тыюу салынат:

-Ала-Тоо аянты;

-Эркиндик бульвары-Линейный көчөсүнөн Чүй проспектисине чейин;

-президенттик администрациянын имаратынын алды;

-Жогорку Кеңештин имаратынын алды;   

-Таттыбүбү Турсунбаева сквери;

-Жогорку соттун имаратынын алды;

-Орусия элчилигинин алды;  

-Панфилов паркы;   

-УКМК имаратынын алды.

Бул тыюунун мамлекеттик жана муниципалдык иш-чараларга тиешеси жок.

Бишкек шаарынын борбордук бөлүгүнө митинг өткөрүүгө тыюу салуу 2022-жылдын март айында кабыл алынган.  

Соттун чечими Конституцияга каршы келет

Баш мыйзамдын 39-беренесине ылайык, ар бир адам тынч чогулуштар эркиндигине укуктуу.

Ал эми Кыргыз Республикасы кошулган “Жарандык жана саясий укуктар жөнүндө” Эл аралык Пактынын 21-беренесинде дагы жарандардын тынч чогулуу укугу таанылган. 

Архивдик сүрөт.