Бишкекте таштандыдан электр энергиясын өндүрүүчү заводдун 2-этабынын курулушуна мезгил кутусу салынды

Бишкекте тиричилик калдыктарын утилдештирүү аркылуу электр энергиясын өндүрүү боюнча эко-технологиялык заводдун экинчи этабынын курулушунун мезгил кутусун салуу аземи 11-июнда өттү.

Бул тууралуу Бишкек мэриясы билдирди.

Ага Министрлер кабинетинин төрагасы Адылбек Касымалиев, Бишкек шаарыны мэри Айбек Жунушалиев, Кытайдын элчиси Лю Цзянпин, «Цзюньсинь Хуаньбао Кей Джи Инвест» компаниясынын директору Дай Даого жана башкалар катышты.

Долбоордун экинчи этабына суткасына 2000 тоннага чейин кубаттуулуктагы эко-технологиялык заводдун экинчи блогун жана 60 МВт кубаттуулуктагы заманбап энергетикалык комплексти куруу кирет.

Объект ишке киргенден кийин жылдык электр энергиясын өндүрүү болжол менен 307 миллион кВт/саатты түзөт, бул болжол менен 100 миң үйдү электр энергиясы менен камсыз кылууга жетиштүү болот.

Экинчи фазанын аякташы калдыктарды жок кылуу көлөмүн бир топ азайтып, шаардын таштанды полигонуна түшкөн жүктү жеңилдетет, экологиялык абалын жакшыртат жана жаңы жумуш орундарын түзөт.

Толук ишке киргенден кийин эко-технологиялык завод күнүнө 3000 тоннага чейин катуу тиричилик калдыктарын кайра иштетип, 90 МВтга чейин электр энергиясын өндүрө алат.

Бишкек катуу тиричилик калдыктарын кайра иштетүү жана электр энергиясын өндүрүү боюнча эко-технологиялык заводдун биринчи фазасынын алкагында 1500 тоннадан ашык калдыктарды кайра иштетип жатат.

Сүрөт: bishkek.gov.kg