Бишкекте КМШнын тышкы иштер министрлеринин жыйыны өтүүдө
- 1 год мурун
Бүгүн, 12-октябрда, Бишкекте Көз Карандысыз Шериктештер Мамлекеттеринин тышкы иштер министрлеринин жыйыны өтүүдө. Иш-чарага Кыргыз Республикасынын тышкы иштер министри Жээнбек Кулубаев төрагалык кылууда.
Ага тогуз өлкөнүн – Азербайжан, Армения, Беларус, Кыргызстан, Казакстан, Өзбекстан, Орусия, Тажикстан жана Түркмөнстандын тышкы иштер министрлери катышууда.
Бул жолку отурумга Молдованын өкүлдөрү келген жок. Армениядан тышкы иштер министринин орун басары катышууда.
Министрлер Бишкекте 13-октябрда өтө турган президенттердин саммитинде карала турган маселелерди талкуулашат.
КМШ саммитинде уюмга мүчө өлкөлөрдүн соода-экономикалык, маданий-гуманитардык чөйрөлөрдө кызматташтыгын кеңейтүү жана чыңдоо боюнча чечимдер кабыл алынарын президенттин администрациясынын тышкы саясат бөлүмүнүн башчысы Муратбек Азымбакиев 4-октябрда билдирген.
Сүрөт: КР Тышкы иштер министрлигинин басма сөз кызматы.
