Бишкекте Bishkek Snow Leopard Run жарышы өттү

21-сентябрын Бишкектин Ала-Тоо аянтында өлкөнүн башкы спорттук жарышы — Bishkek Snow Leopard Run өттү. Жарышка 5000дей катышуучу, анын ичинде 3 жаштан 13 жашка чейинки 500 бала катышты.

Бул тууралуу Бишкек мэриясы билдирди.

Маалыматта айтылгандай, ачылышта Бишкек шаарынын мэри Айбек Жунушалиев ар бир катышуучу жаратылышты жана ак илбирсти сактоого өз салымын кошуп жатканын, мэрия мындан ары да спорттук демилгелерди колдоп, активдүү жашоо маданиятын өнүктүрүүнү белгиледи.

Багыт борбор шаардын негизги көчөлөрү аркылуу өттү: Чүй проспектиси, Абдрахманов көчөсү, ВДНХ аймагы жана Чыңгыз Айтматов проспектиси. Жарыш 5 км, 14 км жана 21,1 км жарым марафонду, ошондой эле балдар үчүн 100 м, 300 м, 500 м жана 1 км аралыкка чуркоону камтыды.

Жарышка Россия, Казакстан, Өзбекстан, Германия, Улуу Британия, АКШ, Түркия жана башка 24 өлкөнүн спортчулары жана ышкыбоздору катышты. Жалпысынан 672 эл аралык спортчу, Кыргызстандын аймактарынан 1245 катышуучу жана борбор калаанын 2865 тургуну катышты.

2025-жылдын январында жарыш түрк элдеринин марафондор альянсына (ТАН) кошулуп, маршрут Эл аралык марафондор жана аралыктар ассоциациясы (AIMS) тарабынан тастыкталып, эл аралык жарым марафон календарына киргизилген.

Катышуучулар арасында кесипкөйлөр, ышкыбоздор, майыптыгы бар адамдар жана өзгөчө муктаждыктары бар балдар болгон. Кирүү акысынын бир бөлүгү адаттагыдай эле ак илбирсти жана анын экосистемаларын сактоо программаларына жумшалат.

Катышуучулар үчүн фотозоналар, фудкорттор жана байге лотереясы уюштурулган. Бардык жеңүүчүлөргө эстелик медалдар,  демөөрчүлөр тарабынан сыйлыктар тапшырылды.

Сүрөт: bishkek.gov.kg