Бишкек мэриясы электр чыгырык саткандарды коопсуздук чараларды колдоого чакырат

Бишкек шаарынын мэриясы Министрлер кабинетинин токтомунун долбоору учурда ведомстволор аралык макулдашуу жана коомдук талкуудан  өтүп жаткандыгын жана анда жеке мобилдүүлүк каражаттарынын (ЖМК), анын ичинде электр чыгырыктарынын жогорку ылдамдыгын саатына 25 км/сааттан 15 км/саатка чейин түшүрүү каралгандыгын маалымдайт.

Бул чараны кабыл алуу зарылчылыгы пикир келишпестиктердин жана кырсыктардын саны өсүп жаткандыгына, ошондой эле жөө жүргүнчүлөрдүн жана электр чыгырык колдонуучуларынын коопсуз кыймылын камсыздоо аракетинен улам келип чыкты.

Тиешелүү ченемдик укуктук акт азырынча кабыл алына элек болсо да, Yandex, ToGo, Sun Rent жана башка ири электр самокаттарын ижарага берүүчү операторлор муниципалитеттин демилгесин колдоп, өз унааларынын максималдуу ылдамдыгын ыктыярдуу түрдө чектеп коюшту.

Бишкек шаарынын мэриясы электр самокаттарын саткан уюмдарды жана жеке ишкерлерди:

— Мүмкүн болсо, белгилүү бир моделдин техникалык мүнөздөмөлөрүн эске алуу менен сатылган электр самокаттарынын жогорку ылдамдыгын программалык түрдө конфигурациялоого же 15 км/саатка чейин чектөөгө;
— Сатып алуучуларды самокаттарынын ылдамдыгын чектөө боюнча учурдагы жана пландаштырылган чаралар жөнүндө маалымдоого;
— Бишкекте жеке мобилдүүлүк каражаттарын коопсуз пайдалануу маданиятын жайылтууга чакырат.