Адылбек Касымалиев Кырчын жайлоосунда “Көчмөндөр ааламы” этношаарчасынын ачылышына катышты

Министрлер кабинетинин төрагасы Адылбек Касымалиев Дүйнөлүк көчмөндөр оюндарынын алкагында Кырчын жайлоосунда уюштурулган «Көчмөндөр ааламы: Жандуу мурас» аттуу этно-шаарчанын ачылыш аземине катышты.

Бул тууралуу МинКаб сайтында маалымдалды.

Этно-шаарчанын ачылыш аземинде Касымалиев Дүйнөлүк көчмөндөр оюндарынын өзгөчөлүктөрүн белгиледи. 

“Бүгүн Кырчындын төрүндө көчмөн цивилизациясынын тарыхын, маданиятын, наркын жана өнөрүн бириктирген «Көчмөндөр ааламы» этно-шаарчасы салынып, жолу жаңыланды. Бул иштер бир күндүк иш-чара үчүн эмес – жаңы жолдор туризмге, шаарча бабалар мурасын таанытууга кызмат кылат” деди Адылбек Касымалиев.

Министрлер Кабинетинин Төрагасы этно-шаарчада уникалдуу маданий мейкиндик түзүлгөнүн белгиледи.

-Кырчындын укмуштуудай кенен мейкиндигине көз чаптырганда, биз ата-бабаларыбыздын дүйнөсүнө саякаттагандай болобуз. Бул жерде кыргыз боз үйлөрү катар-катар тигилген. Улуттук кийимдер, элдик кол өнөрчүлүк, салттуу оюндар, каада-салттар, ыр-күүлөр — кылымдар бою бизге мурас болуп жеткен бул дүйнө бүгүн бул жерде бирдиктүү бүтүндүк катары чагылдырылууда. «Көчмөндөр ааламы: жандуу мурас» деген аталыштын өзүндө терең маани жатат. Биз бабалар мурасын музейдин айнегинин артында гана сактабай, элдин жашоосуна алып чыгып жатабыз. Боз үйдү бүгүн да тигебиз – бул жандуу мурас. Комузду бүгүн да чертебиз – бул жандуу мурас. Кийиз басып, шырдак шырып, темир согуп, ат жабдыгын жасап келебиз – бул жандуу мурас. Ата өнөрү балага, эне өнөрү кызга өтүп жатат” деди ал.

Сүрөттөр: gov.kg