Сот Курманбек Бакиевдин инисине байланыштуу өкүмдү жокко чыгарды
- 3 года мурун
Жогорку Сот качкын президент Курманбек Бакиевдин бир тууганы Каныбек Бакиевге карата чыгарылган өкүмдү жокко чыгарды.
Мындай чечим 27-апрелде кабыл алынган. Кылмыш иши “кылмыш ишинин материалдары толук изилденбегендигине, процесстик мыйзам бузууларга, ошондой эле соттордун корутундулары менен иш жүзүндөгү келишимдердин дал келбестигине байланыштуу” деген жүйөө менен Жалал-Абад шаардык сотуна кайра кароого жөнөтүлгөн.
Бакиев Каныбек Салиевичтин жактоочусунун аны толугу менен актоо тууралуу кассациялык даттануусу канааттандыруусуз калтырылган.
Эске салсак, Каныбек Бакиев 2005-жылы Сузак районунун Ырыс айыл аймагынын башчысы болуп турганда Жер тилкелерин бөлүштүрүү боюнча комиссиянын төрагасы катары жер тилкелери мыйзамсыз берип, кызмат абалынан кыянаттык менен пайдаланган.
Ошондой эле 2010-жылдагы апрель окуялары боюнча да ага карата кылмыш иши козголгон.
2020-жылдын март айында Жалал-Абад шаардык соту аны «кызмат абалынан кыянаттык менен пайдалануу» беренеси менен күнөөлүү деп таап, 6 жылга эркинен ажыраткан.
Экинчи инстанциядагы сот 2020-жылдын декабрында бул өкүмдү өзгөртүп, Каныбек Бакиевге 4 миллион сом айып пул салган.
Фото интернеттен алынды
