Ысык-Ата районунда дайынсыз болуп жаткан уландын сөөгү табылды

Ысык-Ата районунда дайынсыз болгон 19 жаштагы уландын сөөгү табылды. Бул тууралуу Чүй облустук ички иштер башкы башкармалыгы (ОИИББ) билдирди.

31-октябрда милицияга 2007-жылы туулган Азим Жыргалбековдун дайынсыз жоголгону тууралуу арыз түшкөн. Арызда ал 28-октябрда Бишкек шаарындагы батиринен чыгып кеткен бойдон дайынсыз болуп жатканы көрсөтүлгөн.

Аталган факты каттоого алынып, издөө жана текшерүү иштери башталган. Текшерүүнүн жүрүшүндө дайынсыз болуп жаткан бала акыркы жолу Ысык-Ата районунун Дмитриевка айылында достору менен жолукканы аныкталган.

9-ноябрда Өзгөчө крдаалдар министрлигинин (ӨКМ) жана милиция кызматкерлери тарабынан жүргүзүлгөн издөө иштеринин жүрүшүндө Азим Жыргалбековдун сөөгү Дмитриевка жана Буденовка айылдарынын ортосундагы Ысык-Ата дарыясынан, көпүрөгө жакын жерден табылган.

Учурда аталган факты боюнча тиешелүү текшерүү иштери жүргүзүлүүдө. Окуянын жагдайлары такталууда.

Сүрөт: Чүй ОИИББ