Прокурор соттон укук коргоочу Азиза Абдирасулованы 3 миң сом айыпка жыгууну суранды
- 2 года мурун
Бүгүн, 25-ноябрда Бишкектин Биринчи май райондук сотунда укук коргоочу Азиза Абдирасулованын иши каралып жатат. Прокурор соттон Абдирасулованы 3 миң сом айыпка жыгууну суранды.
21-ноябрда райондук сотто Азиза Абдирасулованын ишин карала баштаган. Анда укук коргоочу материалдар менен таанышууга убакыт сураган. Сот анын өтүнүчүн канааттандырып, жараян 23-ноябрда улана турган болгон.
23-ноябрда прокурор жок болгонуна байланыштуу ишти кароо бүгүнкүгө жылдырылган.
15-ноябрда “Кылым шамы” бейөкмөт уюмунун негиздөөчүсү, укук коргоочу Азиза Абдирасулованы милиция кызматкерлери кармап кеткен. Ушул эле күнү Сапар Аргымбаев да кармалган.
Абдирасулова менен Аргымбаевге укук бузуулар кодексинин 128-беренеси, «Милиция кызматкерлеринин мыйзамдуу талаптарына баш ийбөө» беренесинин негизинде протокол толтурулгандан кийин кое берилген.
15-ноябрда парламенттин алдына 30дай киши Кемпир-Абад суу сактагычынын жеринин Өзбекстанга берилишине каршы акцияга чыгышкан. Милиция Ак үйдүн алдында акция өткөрүүгө соттун чечими менен тыюу салынганын билдирип, андан кийин акция Максим Горький атындагы гүлбакта улантылган.
Кемпир-Абад маселесине байланыштуу “массалык башаламандык уюштурууга даярдык көрдү” деген шек менен буга чейин 26 киши камакка алынган.
15-ноябрда Бишкекте акция учурунда милиция тарабынан кармалган укук коргоочу Азиза Абдирасулова жана Сапар Аргымбаев төрт сааттан кийин бошотулган.
