Министрлер кабинетинде баанын жогорулашын жана инфляцияны ооздуктоо чаралары талкууланды
- 2 месяца мурун
- Жаңылыктар
Министрлер кабинетинде төраганын биринчи орун басары Данияр Амагелдиевдин жетекчилиги алдында 21-августта 2026-2027-жылдары баанын жогорулашын жана инфляцияны ооздуктоо чаралары талкууланды.
Бул тууралуу МинКаб сайтында маалымат жарыяланды.
Анда айтылгандай, төмөнкүдөй чараларды көрүү пландалды:
-эт өндүрүүнү көбөйтүү, анын ичинде малдын башын кеминде 20 миңге көбөйтүү;
-баага мамлекеттик көзөмөлдү күчөтүү, эттин баасынын жогорулашына жол бербөө;
-агросектор өндүрүшүн колдоого алуу, агрокомплекс өндүрүшүнө, май өндүрүү тармагына жеңилдик менен кредит берүүнү колго алуу;
-кампа логистикасын өнүктүрүү, ар бир облуста сыйымдуулугу жалпы18 миң тоннаны түзгөн кампа объекттерин куруу;
-буудай менен толук камсыздоо, мамлекеттик корду толуктоо үчүн жергиликтүү фермерлерден 20 тоннадай буудай сатып алуу;
-фермердик чарбаларды 68 миң тонна үрөн менен камсыздоо, минералдык жер семирткеичтерди тиешелүү көлөмдө камсыздоо;
-айыл чарба азыктарын ортомчулардын санын кыскартуу менен түз камсыздоо, соода түйүндөрүн көбөйтүү жана башка чаралар талкууланды.
Аталган иш-чаралар Улуттук банк менен макулдашуунун алкагында болжол менен инфляцияны 7% деңгээлинде камсыз кылууга өбөлгө түзөт.
Данияр Амангелдиев аталган иш-чараларды өзгөчө көзөмөлгө алуу тапшырмасын белгиледи.
2026-2027-жылдарга финансылоонун жалпы көлөмү 36 млрд 635 млн сомду түзөт.
Иллюстрациялык сүрөт: Интернет булактарынан
