Кой-Таш окуясы: Сот Атамбаевди 11 жыл 6 ай эркинен ажыратты. Ниязов, Жээнбеков, Карамушкина камакка алынды  

Бүгүн, 3-июнда, кечинде Бишкек шаарынын Биринчи май райондук соту, судья Азирет Медеров Кой-Таш окуясы боюнча өкүмдү угузду.

Мурдагы президент Алмазбек Атамбаевди үй-мүлкүн конфискациялоо, мамлекеттик сыйлыктарын кайтарып алуу менен 11 жыл 6 айга эркинен ажыратуу чечимин чыгарды;  

Президенттик аппараттын мурдагы жетекчиси Фарид Ниязовду — 7 жыл 8 айга;

Саясатчы Равшан Жээнбековду — 7 жыл 8 айга;

Жогорку Кеңештин мурдагы депутаты Ирина Карамушкинаны 7 жыл 6 айга эркинен ажыратуу өкүмү чыкты.

Сот залынан Фарид Ниязов, Равшан Жээнбеков, Ирина Карамушкина камакка алынды.

Жогорку Кеңештин мурдагы депутаты Асел Кодурановага 3 жыл пробация;

Жогорку Кеңештин мурдагы депутаты Мээрбек Мискенбаевге 5 жыл пробация;

Алмазбек Атамбаевдин мурдагы жансакчысы Канат Сагынбаевге 5 жыл пробация;

Журналист Кундуз Жолдубаевага  5 жыл пробация;

Фархад Баабиевди 5 жыл 6 ай эркинен ажыратуу;

Канат Өскөналиевге 5 жыл пробация;

Карыпбек уулу Рыспекке 5 жыл пробация;

Амангелди Какебаевге 3 жыл пробация;

Марат Шаменовго 3 жыл пробация;

Нооруз Капарбек уулуна 3 жыл пробация жазасын чегерди.

Ал эми башка эпизоддор боюнча:

Мурдагы ички иштер министри Абдылда Суранчиевге мөөнөтү өтүп кеткендигине байланыштуу жаза чегерилген жок;

Исабек Абдыгазиевге мөөнөтү өткөндүгүнө байланыштуу жаза чегерилген жок;

Төрөхан Тынымсеитовго мөөнөтү өтүп кеткендигине байланыштуу жаза берилген жок;

Аскарбек Шадиевди үй-мүлкүн конфискациялоо менен 15 жыл 6 ай эркинен ажыратуу чечимин чыгарды;

“Дастан” компаниясынын мурдагы директору Юрий Васильевге мөөнөтү өтүп кеткендигине байланыштуу жаза берилген жок;

Сот Аскарбек Шадиев менен Алмазбек Атамбаевден 5 млрд 439 млн сом өндүрүү чечимин чыгарды.

Судья Азирет Медеров эркинен ажыратылгандарды сот залынан камакка алуу чечимин чыгарды.  

2019-жылдын августундагы Кой-Таш окуясына байланыштуу сот Бишкектин Биринчи Май райондук сотунда улантылган.

Кой-Таш окуясы боюнча мурдагы президент Алмазбек Атамбаев, мурдагы депутаттар Ирина Карамушкина, Асел Кодураңова, Равшан Жээнбеков баштаган 14 кишинин тергөө иши 2020-жылдын февраль айында сотко өтүп, ишти Биринчи май райондук соту караган.

2019-жылдын 7-8-август күндөрү мурдагы президент Алмазбек Атамбаевди кармоо учурунда УКМКнын бир кызматкери өлүп, бир топ укук коргоо органдарынын кызматкерлери жарат алган. Андан тышкары, 136 адам медициналык жардам алуу үчүн кайрылган.

Сүрөт: Интернет булактарынан