Кедейчиликти жоюунун жаңы модели ишке киргизилүүдө

Кыргызстанда кедейчиликти жоюунун жаңы модели ишке киргизилип жатат.

Бул тууралуу эмгек, социалдык камсыздандыруу жана миграция министрлигинин басма сөз кызматы билдирди.

Министр Кудайберген Базарбаев муктаждарга жардам берүүнүн “Эмгек үчүн — азык-түлүк” аттуу модели дүйнө жүзү боюнча колдонулуп келгендигин белгиледи. Бул БУУнун дүйнөлүк азык-түлүк программасынын биздин мамлекеттеги кеңсесинин ишинин жыйынтыгы экени белгиленди.

“Бул программа Кыргызстанда натыйжалуулугун көрсөттү. Мындан ары БУУнун азык-түлүк программасынын Кыргызстандагы өкүлчүлүгү менен бирдикте кедейчиликтен арылуунун ушул түрү менен иштейбиз” деди Базарбаев БУУНун азык-түлүк программасынын бул өлкөдөгү директорунун милдетин аткаруучу Рам Сараванамутт менен жолугушууда..

Жолугушуунун жүрүшүндө айыл чарба жумуштарына (жашылча-жемиш, бак, балык,  токой өстүрүү, жем чыгаруу, азык-түлүктү кайра иштетүү сыяктуу) киреше алып келүүчү тармактарга социалдык коргоого муктаж жарандарды тартуу иштери тууралуу сөз жүрдү.  

Бул үчүн аларды окутуу боюнча  68 курс киргизилди.  

БУУнун азык-түлүк программасы фермерлерге чакан бизнес ачууга, мисалы азык-түлүк продукциясын кайра иштетүү боюнча да жардам берет.     

Сүрөт: Министрликтин басма сөз кызматы.