Нарын шаарына, Ат-Башы районунун аймагына өзгөчө абал киргизилди
- 5 лет мурун
Президент Сооронбай Жээнбеков бүгүн, 14-апрелде, Нарын облусунун Нарын шаарынын жана Ат-Башы районунун аймагында өзгөчө абал киргизүү жөнүндө жарлыкка кол койду.
Жарлыкта Нарын облусунун Нарын шаарынын жана Ат-Башы районунун аймагында 2020-жылдын 15-апрелинен саат 08.00дөн баштап 2020-жылдын 30-апрелине саат 08.00гө чейин өзгөчө абал киргизилгени айтылат.
Өзгөчө абал киргизилген мезгилде ички иштер министрлигинин Нарын облусунун ички иштер башкармалыгынын начальниги Уланбек Аалиев Нарын облусунун Нарын шаарынын жана Ат-Башы районунун коменданты болуп дайындалары белгиленген.
18-марттан 14-апрелге чейинки мезгил аралыгында Кыргыз Республикасынын аймагында жарандардын коронавирустук инфекцияны жуктуруп алган 430 фактысы, анын ичинде Нарын шаарында — 5, Нарын облусунун Ат-Башы районунда — 19 факт тастыкталды.
Бишкек жана Ош шаарларынын, Ош облусунун Ноокат жана Кара-Суу райондорунун, Жалал-Абад шаарынын жана Жалал-Абад облусунун Сузак районунун аймактарында өзгөчө абал 2020-жылдын 30-апрелине чейин узартылды.
Сүрөт: Республикалык штаб.
