Өкмөт башчы эки жаранды ур-токмокко алгандарга чара көрүүнү тапшырды
- 5 лет мурун
Мухаммедкалый Абылгазиев Ички иштер министри Кашкар Жунушалиевге Бишкек шаарында эки жаранды ур-токмокко алуу фактысын иликтөө боюнча акыркы чараларды көрүүнү тапшырды.
Бул тууралуу өкмөттүн маалыматтык кызматы билдирди.
Мындан тышкары Саламаттык сактоо министрлигине жабыркагандарга квалификациялуу медициналык жардам көрсөтүүнү, зарыл дары-дармектер менен камсыздоо тапшырмасын берди.
«Ырайымсыздыгы менен таң калтырган 2019-жылдын 28-августунда болуп өткөн эки жаш жигитти ур-токмокко алуу окуясы тыкыр иликтенип, күнөөлүү адамдар жоопко тартылууга тийиш. Окуя болгон жерге келип, кайдыгерлик жана кесипкөйсүздүк көрсөткөн милиция кызматкерлерине карата тийиштүү чаралар көрүлүшү керек. Укук коргоо органдарында мындай кызматкерлерге орун жок», — деп баса белгиледи Абылгазиев.
Чүй облусунун ички иштер башкармалыгынын кызматкери массалык мушташ болгон жерден шектүүлөрдү калкалап алып кеткендиги маалым болгон.
