​Унаага электрондук уруксат системасы ишке кирди (Видео)

Өзгөчө абал режимин камсыз кылууда ишке тартылган мекемелер менен уюмдардын унаа каражаттарына электрондук ураксат кагаздарын алуу үчүн онлайн система ишке кирди.

Бул Бишкек шаары боюнча коменданттык саат күчүнө кирген мезгилде жүрүүгө уруксат берет. Онлайн система алыстан туруп арыз берип, электрондук уруксат алууга шарт түзөт.

Арыз берүү үчүн максатты жана убакыт-саатын көрсөтүүү менен тийиштүү документтерин тиркеп, ресурста көрсөтүлгөн электрондук форманы толтуруу керек.

Нускамага ылайык тастыктоочу документтерди арызга сөзсүз тиркеш керек. Эгерде белгилүү бир ишмердүүлүк унаа каражатында айдоочудан сырткары кошумча жүргүнчүсү менен дайыма жүрүүнү талап кылса, ресурска жүргүнчүнүн маалыматтарын да жүктөө зарыл. Арыз толтуруунун нускамасы:

Арыз 24 сааттын ичинде каралат. Арыздын статусу (каралууда, жактырылды, жактырылган жок) толтурулган форманын баракчасына чыгат. Арыз жазылган жана электрондук уруксат көрсөтүлгөн бетти жоготуп албоо үчүн, шилтемени көчүрүп алыңыз же QR-кодун жүктөп алыңыз.

Жактырылгандан кийин арыз берүүчү өзүнүн уруксатын QR-коду менен кошо басып чыгарып, уруксат берилген унаанын маңдайкы терезесине чаптап коюу керек (же жанында алып жүрүшү керек). Анын түп нуска экендиги ыйгарым кызматкерлер тарабынан каалаган смартфондо QR-код аркылуу текшерилет.

Онлайн система https://1312.tunduk.kg/ шилтемеси боюнча иштейт. Иштеп чыккан – «Түндүк».

Суроолор жаралса, 1312 номери боюнча комендатуранын колл-борборуна кайрылса болот.

Коронавирус коркунучуна байланыштуу 25-марттан тартып, Бишкек, Ош, Жалал-Абад шаарларында, Ноокат, Кара Суу, Сузак райондорунда өзгөчө абал киргизилген.