Уруксат берилбеген жерлерде сууга түшүүгө тыюу салынат

Бишкек шаарынын мэриясы борбор шаардын конокторуна жана тургундарына көлдөрдө сууга түшүүдө этият болууну жана көлдөрдүн, суу сактагычтардын жана каналдардын жанындагы эс алуу жайларында жашы жете электерге көзөмөлдү күчөтүүнү сунуштайт.

Ошондой эле тыюу салынган жерлерде сүзүүгө, тосмо белгилеринен ары сүзүүгө, көпүрө жана пирстерден секирүүгө тыюу салынат. Мындан тышкары мас абалындагы адамдарга сууга түшүүгө тыюу салынат.

«Борбор шаардын муниципалитети кырсыктардын көбү ата-энелердин этиятсыздыгынан болуп жатканын билдирип, чоңдорду балдарды сууда кароосуз калтырбоого чакырат. 12 жашка чейинки балдар чоңдордун көзөмөлүсүз жүрүүгө болбойт» деп билдирди борбордун мэриясы.

Маалыматта айтылгандай, өзгөчө кырдаалдар министрлигинин (ӨКМ) Бишкек шаардык башкармалыгынын маалыматына ылайык, борбордо 51 суу объектиси бар. Бүгүнкү күндө 27 объект текшерилип, калган объектилер боюнча текшерүү иш-чаралары белгиленген тартипте улантылат.

Мындан тышкары борбор шаардагы суу объектилеринин жанына баннер, “Сууга түшүүгө болбойт” деген жазуулар орнотулуп, адамга түшүндүрүү иштери жүргүзүлгөнү айтылат.

Иллюстрациялык сүрөт: Интернет булактарынан