Бишкекте автобус каттамдары өзгөртүлдү  

Борбор шаардын Чүй проспектисинде жер алдындагы өтмөк жана унаа токтотуучу жайлардын курулушуна байланыштуу автобустардын каттамдары өзгөртүлдү. Бул тууралуу Бишкек мэриясы кабарлады.  

Маалыматта айтылгандай, Чүй проспектиси менен Шопоков көчөсүнүн кесилишинде жер алдындагы өтмөк жана унаа токтотуучу жай куруу боюнча ири долбоорго даярдык иштери башталды. 2025-жылдын 9-майында саат 22:00дөн баштап Чүй проспектисинин Абдрахманов көчөсүнөн Ибраимов көчөсүнө чейинки бөлүгү унаа кыймылы үчүн толугу менен жабылат.

Ушуга байланыштуу жогоруда аталган аймакта курулуш иштери жүрүп жаткан мезгилде айрым автобустук каттамдардын кыймыл схемасы өзгөрөт.

Абдрахманов жана Ибраимов көчөлөрү кесилишкен бөлүгүндөгү №7, 34, 38, 166-маршруттук каттамдар Жумабек көчөсүнө багытталат. Ал эми ушул эле кесилиштеги №5, 11, 16, 21, 25, 36, 50, 104, 129, 135, 152, 169, 216, 222, 227 жана 254-маршруттук каттамдар убактылуу Киев көчөсү аркылуу өткөрүлөт.

“Ташболот Холдинг” компаниясынын жеке инвестицияларынын негизинде ишке ашырылып жаткан долбоордо жолдун үстүн толугу менен ачуу пландаштырылгандыктан, бул иштер болжол менен 6 айдан 8 айга чейин созулат, жалпы бюджети 2 миллиард сомду түзөт.

Сүрөт: Интернет булактарынан