ЖККУнун башкы катчысы: Казакстанда уюмдун 2500 аскери болот
- 3 года мурун
Казакстанда Жамааттык коопсуздук келишими уюмунун (ЖККУ) баш-аягы 2500 аскери болот.
Бул тууралуу уюмдун баш катчысы Станислав Зась Орусиянын мамлекеттик “РИА Новости” агенттигине билдирди.
«Кырдаалга жараша иш кылабыз. Керек болсо, күчтөндүрөбүз», — деди Зась.
Казакстанга ЖККУнун күчтөрүн жөнөтүү процесси 7-январда жыйынтыкталды.
Бейшембиде Орусиянын аскерлеринин алгачкы бөлүгү Казакстанга келип түштү. Ошондой эле Армения, Беларус жана Тажикстан, Кыргызстан да Казакстанга «бейпилдик күчтөрүн» жөнөттү.
Кыргызстандын аскерлери 7-январда Казакстанга барышты.
Аскерлер менен атайын техниканы Канттагы Орусиянын авиабазасынан Ил-76 үлгүсүндөгү жүк ташуучу учактар салып кетти. Коңшу өлкөгө Кыргызстандан 150 аскер, сегиз чопкутталган техника, 11 машине барары кабарланган.
Кыргыз аскерлери Казакстандын стратегиялык объектилерин кайтарып, коомдук тартипти калыбына келтирүүгө көмөктөшөт.
6-январга караган түнү казак президенти Касым-Жомарт Токаев «террордук коркунучту жөнгө салуу» деген жүйө менен ЖККУдан жардам сураган.
6-7-январь күндөрү Бишкекте Казакстанга аскерлерди жөнөтүүгө каршы акциялар өткөн.
Сүрөт: TASS.
